KUCHING, 26 Sept: Atlit Para Nikau Peluru Sarawak, Jap Soon Hung sekali agi mujur nempa rikod baru ba achara nikau chakera lelaki kategori F54, sereta nyadi midul emas kedua diulih iya ungkup kontinjen Sarawak ba Para Lumba Malaysia (SUKMA) ke-21 sehari tu.
Soon Hung, 39 taun, nempa rikod baru sepengudah tetikauka penyauh 21.07 meter, mechahka rikod lama dipenggi iya empu, 20.86 meter ke ditempa maya Para SUKMA edisi 2018 di Perak.
Ku iya, midul emas ke diulih iya nya khas ungkup Perintah Sarawak.
“Serak tu, aku endang gaga ati laban tu rikod lama aku (pechah), Puji Tuhan.
“Midul emas tu ungkup Sarawakku Sarawak, laban perintah Sarawak mayuh nyukung raban OKU,” ku iya maya dirandau pengudah Pengawa Nyuaka Midul ngagai bala pemenang di Stadium Sarawak, ditu, sehari tu tadi.
Berengkah enggau Para SUKMA ba taun 2014, Soon Hung madah iya berengkah enggau achara padang iya nya lumba kerusi ruda, diatu nadai agi dipekitka lalu ngujungka iya milih achara bukai.
Udah nya, ngelansa senentang penyelai ditapi iya, Soon Hung madah iya enda ulih bejalai laban suba sida (sebilik) laun nemu penyakit utai tumbuh (tumor) ba tulang belakang iya.
“Umur aku 12 taun baru aku nemu diri bisi tumor. Maya nya aku deka nurun ke sekula, enda memukai kaki aku enda ulih bejalai. Lebuh diperesa, udah majak besai. Aku nadai ngasaika sebarang kelai (pedis),” ku iya.
Bemalinka rambai jaku ‘Agi Idup, Agi Ngelaban”, iya ngelalau bala atlit para ke agi biak anang jampat mantul ati enggau mesti seruran bebendar belatih.
Ke penerang, penudul lumur dua enggau ketiga ba achara nya dipenggi atlit Para Sabah, Freddy Waldie ke ngembuan penyauh rikod tikau 20.44 meter sereta Muhammad Khairi Military, 18.45 meter. -TVS
