BETONG, 26 Sept: Pejalai Projek Transformasyen Menua Pesisir ungkup sitak Kunsil Nengeri (DUN) Kedup bejalai lanchar.
Kaban Kunsil Nengeri (ADUN) Kedup Datuk Martin Ben madah, urung 95 peratus ari penyampau semua projek nya ungkup taun 2023 di DUN kedup udah mujur dipejalaika penuh naka tu.
Ku iya, ungkup taun 2024 urung 70 peratus ari 32 projek udah diserah ngagai kunteriktor ke udah dipadau.
“Projek Transformasyen Menua Pesosor ba sitak Kedup endang bejalai enggau lanchar.
“Nyadi aku deka meri besai terima kasih ngagai semua ejensi pengereja pengawa ke bekaul ungkup taun 2023 semua udah bejalai lalu 90 peratus tauka 95 peratus udah tembu digaga.
“Ungkup taun 2024 sekeda benung digaga lalu bisi mega udah diserah ngagai kunteriktor, di Kedup antara 28 nyentuk 32 projek benung digaga,” ku iya.
Iya ke mega Sapit Menteri Industri Pemakai, Komoditi enggau Pemansang Wilayah Sarawak (M-Ficord) madah munyi nya pengudah dirandau media maya Program ‘Sustainable Modern Agriculture Through Rural Technoprenuershi’ (SMART) ditu, empai lama.
Ku Martin, iya andal pengandal ke tinggi ngagai semua projrak nya ti ditaga tembu nitih timpuh ke udah ditetapka.
Beduduk ari nya, dia iya muji pemanah kerejasama ke udah diberi semua raban nyengkaum Opis Residen enggau ejensi pengereja pengawa dalam nentuka semua projek ke udah dilanggur di DUN Kedup bejalai enggau mujur magang.-TVS
