MIRI, 23 Sept: Balai Polis Miri ti udah lebih 70 taun diatu benung dikemanah ngena agih belanja sepenyampau RM150,000 ti udah dikemendarka taun nyin ba baruh Projek Transformasyen Menua Pesisir (RTP).
Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew madahka, kunterik kereja ti berengkah kena 15 Ogos tu ngaul proses ngemanah sekeda infrastruktur.
“Tu dikena diubah sereta dikemanah ungkup ruang lokap ba Balai Polis Miri. Pekara tu berengkah beberapa bulan ke udah.
“Lebuh ujan bangat, kami diberi penerang, lalu bisi video enggau gambar ti mantaika gaya sekeda bilik enggau balai nya,” ku iya.
Nitihka penerang ADUN Piasau nya, Balai Polis nya endang udah repuk, berindik ari gaya hari ti enda manah empai lama ke udah, penanggul nya nyau majak balat nyadi.
“Pekara keterubah ke patut digaga enggau lengkas iya nya, sida patut meresa atap nya empu laban ketegal nya meh penanggul nya tau nyadi. Atap nya bisi tiris enggau bisi penanggul.
“ Sida tetemuka bisi lima iti salur mit. Ari lima nya, semina tiga aja ke manah. Dua iti ke bukai nya udah alit,” ku iya.
Projek nya djangka tembu abis nadai minggu tu lalu deka ngangkatmanah baru palan nya ti nyadi sebagi ari kelai pengelikun enggau pengelantang ba mengeri besai Miri.-TVS
