KUCHING, 23 Sept: Perintah Sarawak meri perais penyampau RM500,000 ngagai jaguh angkat berat menua, Bonnie Bunyau Gustin bekau ari penyulut iya udah bulih midul emas sereta mechah rikod dunya ba achara angkat berat maya Lumba Paralimpik 2024 di Paris.
Premier Sarawak Datuk Patinggi Tan Sri Abang Johari Tun Openg madahka Bonnie iya nya chunto ke patut diteladan raban atlit biak.
“Bonnie iya nya model ke patut diteladan. Nya alai aku deka madahka enggau pengaga ati Sarawak deka meri perais RM500,000 ngagai Bonnie ketegal penyulut iya.
“Kitai ngarapka tu deka nyadi peransang ngagai atlit biak ParaSUKMA ngambika chakah belatih nyapai penyulut jemah ila,” ku iya.
Nangkan Abang Johari madahka komitmen sarawak dalam ngemansangka lumba nyengkaum atlit Raban Nyelai Pendiau (OKU).
Ku iya madah Perintah Sarawak udah nganjung atlit Para SUKMA ngagai menua luar ambika belatih dikena nyikap sida bepekit ba pekit Para SUKMA tu.
Abang Johari pechaya enggau pengawa ngatur Para SUKMA, tu ulih meri latih ti chukup beguna ungkup raban atlit dalam ngemansangka diri sereta bulih penyulut jemah ila. -TVS
