KUCHING, 22 Sept: Sarawak dijangka ngembuan serikat penerebai kediri empu ujung taun tu.
Premier Sarawak, Datuk Patinggi Tan Sri Abang Johari Tun Openg madahka, iya andal juluk perintah Sarawak deka bisi serikat penerebai nya ulih matak mayuh agi temuai datai ke wilayah tu sekalika ari dalam tauka ari luar Sarawak.
“Pemisi pemansang serikat penerebai tu, kitai (Sarawak) deka ngaga siti padang bilun antarabansa ke baru ti bisi daya nampung penyampau 15 juta iku temuai ba padang bilun nya.
“Padang bilun nya deka nunda model Padang Bilun Antarabansa Doha,Qatar,” ku iya.
Iya mansutka jaku nya rambau program ‘Night At The Museum’ ke diatur ba Muzium Budaya Borneo, ditu kemari.
Abang Johari nerangka, projek ngaga padang bilun baru nya ditaga ngambi timpuh tiga nyentuk ke lima taun sebedau tembu sereta ulih dikena.
“Pemisi infrastruktur baka tu, aku pechaya mayuh temuai deka datai kitu. Sida deka meda pemanah ke bisi ba wilayah tu tauka bejalaika pengawa dagang.
“Nya alai, tu ngayanka Sarawak ulih nyadi palan ngatur bemacham achara ti tau matak temuai,” ku iya.
Pemesai bukai ke bisi ngulu program nya, Tuai Pemegai Menua (TYT) Nengeri Sarawak , Tun Pehin Sri Dr Wan Junaidi Tuanku Jaafar enggau bini iya, Toh Puan Fauziah Mohd Sanusi, Sapit Premier Sarawak, Datuk Amar Dr Sim Kui Hian sereta Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah.-TVS
