SRI AMAN, 22 Sept: Pengawa ngatur Hari Tebuka dipeda nyadi pelasar pemadu manah ngagai raban nembiak meretika peluang gawa ke bisi dalam bidang perubat.
Sapit Direktor Sepital Sri Aman Dr Naquib Akmal Kassim madah, raban nembiak patut meretika mayuh batang pengawa bisi disedia dalam bidang perubat nyerumba program Hari Tebuka nya.
“Pengawa ngatur Hari Tebuka meri peluang ngagai rebak baru nyerungkai enggau meretika bemacham peluang gawa dalam bidang perubat enggau pengerai lebih agi ba Sepital Sri Aman.
“Batang pengawa dalam bidang perubat enggau pengerai ukai semina numpu ngagai lutur enggau misi aja tang mega bidang bukai baka farmasi, radiologi, fisioterapi enggau mayuh agi ke bukai.
“Kelimpah bidang perubat enggau pengerai di sepital, bisi mega bidang administrasyen ke nyadi tulang belakang dikena nentuka operasyen ba sepital bejalai enggau lanchar,” ku iya.
Iya mansutka jaku nya maya ngenataika jaku pengelalu nyerumba Hari Tebuka Sepital Sri Aman ditu, empai lama.
Kenu ku iya, rebak baru patut nguna peluang nya dikena belajar enggau mereti enggau dalam pasal batang pengawa ke dikerindu diri.
Kelimpah ari nyadi pantar endur ngedut kaul pengawa ngatur program nya mega betuju dikena muka runding enggau nyadi peransang ngagai rebak bru masuk bidang perubat enggau pengerai.-TVS
