BETONG, 22 Sept: Bank Negara Malaysia (BNM) udah ngemendarka perintah Sarawak nyadi pemegai majoriti entaruh dalam bank nya seraya pekara nya ngayanka juluk Sarawak deka ngempu Affin Bank Berhad nyau udah deka tejapai.
Premier Sarawak, Datuk Patinggi Tan Sri Abang Johari Tun Openg madahka, penerang rasmi bekaul enggau statusatur ngempu Affin Bank nya deka ditetapka dalam minggu baru.
“Kitai (Sarawak) deka ambi ngempu Bank (Affin Bank). Pekara tu deka tejapai enda lama agi.
“Semua pekara ke patut udah diadu, nyengkaum ari Bank Negara Malaysia (BNM). Kitai nganti aja dalam minggu baru tu,” ku iya.
Iya mansutka jaku nya rambau pengerami 100 tahun Rumah Panjai Samu, Paku, ditu kemari.
Beduduk enggau nya, Abang Johari nerangka, sigi patut Sarawak ngembuan sistem bank kediri empu ke tau nyadi ekosistem bank dikena mantu negapka ekonomi nengeri tu.
“Aku nangika orang berebut deka meli stok tu. Nya kebuah aku enggai madah dulu. Kitai (Sarawak) udah bisi bank kediri empu. Ti suba bank tu dipegai sida di Semenanjung din.
“Diatu, Sarawak deka ambi ngempu Bank Malaysia datai ke Sarawak awakka nyadi siti ekosistem ke manah ungkup nengeri tu,” ku iya.
Bulan 7 taun tu tadi, abang johari madahka senentang penyampau blok saham ke dipegai Sarawak dalam Affin Bank udah nambah kurang lebih 30 peratus ari 4.8 peratus.-TVS
