BETONG, 22 Sept: Premier Sarawak, Datuk Patinggi Tan Sri Abang Johari Tun Openg siku tuai ke bisi pemintar enggau timpai ti jauh mai pemansang di wilayah tu dalam bemacham bidang enggau sektor.
Sapit Premier Sarawak, Datuk Amar Douglas Uggah Embas madahka, Sarawak diaku Bank Dunya nyadi wilayah bepenatai pemisi tinggi mandangka polisi perintah Sarawak ba baruh iring tuai Abang Johari nemban seraya ngayanka iya siku tuai ti inklusif.
“Abang Johari siku tuai ke ngembuan juluk ke besai, berani enggau bebendar ngetanka hak Sarawak,” ku iya madah.
“Empai lama tu tadi, bisi cherita ditusui madahka tuai kitai benasip manah.
“Tang pemujur ke dijapai tu ukai nasip, tang ketegal pemintar enggau langkah rapat ti engkeman dipejalaika Abang Johari,” ku iya madah rambau Pengerami 100 Taun Rumah Panjai Samu, Paku ditu kemari.
Uggah ke mega Menteri Pekara Wang enggau Ekonomi Baru Kedua nerangka, asil penatai pemisi Sarawak taun siti nyin suba pemadu tinggi dalam sejarah iya nya RM13.3 bilion sereta naga asil taun tu ngelui ari 2023.
“Pemisi teknologi maya diatu, kitai ulih nentuka bagi menua (Betong) bepenatai pemisi tinggi manggai taun 2030,” terang iya.
Beduduk enggau nya, iya pechaya Betong ulih nyapai juluk nya jemah.-TVS
