KANOWIT, 21 Sept: Waterfront Kanowit deka digaga ngena tempa tukuh beringkat tauka “double-decker” awakka bisi daya matak mayuh agi temuai datai kia, ku Datuk Amar Dr Sim Kui Hian.
Sapit Premier Sarawak nya madahka, waterfront nya ila dikearapka nya endur mensia mayuh begempuru, ngelantangka ati sereta ngatur bemacham program ke manah ungkup pengerai enggau negutka kaul sida enggau pangan diri.
“Nya alai kita ulih meda tempa tukuh waterfront tu digaga dua ringkat.Tu keterubah iya aku niki ke ringkat atas, sereta ngasaika peneleba ke lebih manah ti dibanding ba ringkat baruh.
“Waterfront tu ukai semina digaga nguna kos penyampau RM5.3 juta aja, tang dijangka nyadi tanda menua di Kanowit, endur mensia mayuh begempuru ngatur mayuh macham achara enggau aktiviti. Pemanah tu mandangka penyerakup kitai ba ditu,” ku iya.
Iya mansutka jaku nya rambau aum media pengudah ngulu Pengerami Bejadika Pesta Kanowit 2024 enggau Waterfront ditu kemari.
Berebak enggau nya, Dr Sim merambu ngambika ngaga kren semak waterfront nya ti ulih mantu ngatung bot ke ngena injin kuasa tinggi ke dalam sungai, seraya nyaup pengawa bukai ti begunaka perengkaguna nya.
Tandu iya, perambu nya ulih dipasuk ba baruh projek rayat laban deka dipejalaika enggau jampat ti dibanding projek bukai.-TVS
