SARIKEI, 21 Sept: Pengawa pansik ke dipejalaika seraban nembiak sebuah sekula sekondari enda jauh ari ai Wong Ruan Sarikei ditu, kemari pulaika penusah sepengudah siku ari sida ditemu lemas.
Tuai Balai Bomba enggau Penyah Penusah (BBP) Sarikei, Penulung Penguasa Bomba Mahmudin Narudin madah, tudah ke bebadi iya nya Alex Lau Hui Peng ditemu pukul 12.03 tengah hari nengah saup raban penyah penusah maya bejalaika operasyen nyidi enggau mantu (SAR) sepengudah dikangau ngesah penusah nya.
“Bomba dipadahka, sebedau penusah nyadi tudah enggau tiga iku agi bakih iya ke sama nembiak Sekula Sekondari (SMK) Sarikei benung bejalaika pengawa pansik ba kandang endur nya.
“Sepengudah pengawa tembu, siku ari sida iya nya tudah (ke bebadi) terejun ngagai sungai laban deka mandi.
“Tang iya dipadahka nadai ayan agi, meda penyadi nya, siku ari bakih tudah berumban madahka pekara nya ngagai orang rumah panjai ke semak minta saup sebedau operasyen SAR dipejalaika raban Bomba Volunteer Lubok Lemba,” ku iya.
Maya operasyen nya dipejalaika ku iya, siku kaban Bomba Volunteer Lubuk Lemba, Branddon Lamada bejalaika pengawa nyelam sungai nya penalam urung tiga meter sebedau ti tetemuka tudah nembiak nya.
Tang maya ditemu tudah nembiak nya dikenuku ke staf Opis Menteri Pengerai Malaysia (KKM) ke sama ba endur nya udah midang.
Dulu ari nya, ku iya raban Balai Bomba Enggau Penyah Penusah Sarikei nerima ripot pasal pemujur tetemuka tudah pukul 11.30 pagi sebedau ke ngesah palan penusah nyadi enggau nyerahka bangkai tudah ngagai raban polis.-TVS
