KUCHING, 21 Sept: Pengerami Bejadika Para Lumba Malaysia (SUKMA) ke-21 disadang ngayanka penegut tali penyerakup rayat pupu bansa di Sarawak nengah bemacham program pemerindang ti deka dibantaika beserimbai enggau achara nya ke diatur malam pagila.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madahka, program nya serak tu mega dipasuk bala anak mit ari renggat pra sekula enggau sekula primari ti deka mantaika bakat sereta pengelandik sida ba dalam program pemerindang.
“Nya alai kitai deka mandangka pengelandik sida ti diberi peluang enggau latih ke chukup, sida tu ulih nyadi siku artis ke profesional.
“Pia mega, bala artis ti dibai kami merindang ari mayuh endur baka ari Sibu, lalu tu mih pekara ke dikumbai pengawa ngelala bakat.
“Tu ngayanka ti sema diberi peluang, bakat nya mesti dikerembai nengah chara meri peluang,” ku iya.
Ba penemu aku, anak-anak Sarawak endang bisi bakat sida empu sekalika nemu belagu enggau mantaika pengelandik bukai.
Iya mansutka jaku nya rambau dirandau media pengudah ngemataka Latih Penuh Pengerami Bejadika Para Lumba Malaysia (SUKMA) Ke-21, ba Stadium Perpaduan Kuching, malam tadi.
Fatimah ke mega nyadi Menteri Bekuasa Pengatur Pengerami Bejadika Para SUKMA 2024 nerangka, bisi 350 iku penyereta ke ngambi bagi dalam program pemerindang ti dibantaika maya malam nya.
“Sida tu diambi kami ari bemacham renggat sekalika ari pra sekula nyentuk nembiak sekula sekondari.
“Pia mega, bisi ari sekula Henry Gurney sereta program pemerindang serak tu bisi ngaul raban Orang Nyelai Pendiau (OKU) sereta anak-anak Sarawak ke udah mujur nempa nama ba tikas antarabansa,” ku iya.
Berindik enggau nya, iya ngarapka mensia mayuh ulih meri sukung ngagai raban atlit ti deka bepekit dalam Para SUKMA serak tu, baka sukung ke diberi sida maya SUKMA 2024 ti mujur diatur bulan siti nyin tadi.
Nitihka rikod, bisi 1,290 iku atlit Para SUKMA ke ngaul 982 iku atlit lelaki enggau 308 iku atlit indu bepekit dalam Para SUKMA 2024, ti berengkah ari 22 nyentuk 28 September tu, sereta bisi 10 bansa lumba enggau main diatur ba 10 iti endur.-TVS
