BETONG, 21 Sept: Pengawa ngatur Lumba Ekstrem 4X4 ulih meri empas positif ngagai industri dagang temuai bepelasarka rampa menua di Betong.
Residen Bagi Menua Betong, Richard Michael Abunawas madah, pemutus milih Betong nyadi palan ngatur ‘Sarawak International 4X4 Jamboree’ serak tu chukup nemban laban pelilih tu ngembuan rampa menua enggau trek ke manah ungkup aktiviti lumba nya.
“Ungkup peminat baka bala aya enggau ibu tu tauka orang bukai ke rindu meda rampa menua kitai di Betong.
“Nyadi kitai endang kaya enggau semua tu semina kitai bedau agi ngelakuka chara besai lalu seninjik bendar program tu keterubah iya diatur ditu nyadi aku ngarapka bala aya enggau ibu terus mantu kitai ngelakuka Betong nyadi palan dagang temuai ke patut ditapatka semua,” ku iya.
Iya madah munyi nya maya ngarika Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu ngulu Pengerami Makai Lemai Meri Basa Sarawak International 4X4 Jamboree Edisi Ke-7 diatur ba Dewan Panglima Rentap, Hari Lima.
Sarawak International 4X4 Jamboree Edisi Ke-7 diatur pengelama seminggu berengkah 14 September tu tadi di Kuching lalu tembu ba Betong.
Aktiviti tu nungkatka pejuluk ‘Warriors Trails – The Journey’ dipasuk urung 570 penyereta ari dalam enggau menua luar nyengkaum Indonesia, Brunei Darul Salam enggau Switzerland.-TVS
