BETONG, 20 Sept: Perintah Sarawak nengah Komiti Kereja Sektor Pemansang Agro Betanam Betupi Ejensi Pemansang Bagi Menua Betong (BDDA) udah ngemendarka agih belanja lebih RM259 juta dikena ngemujurka 43 buah projek betanam betupi di pelilih nya.
Chairman Komiti Kereja Sektor Pemansang Agro Betanam Betupi Bdda, Friday Belik madahka, ari penyampau semua projek nya, bisi 36 projek agi dalam perambu sereta siti projek udah tembu penuh.
“Semua 43 buah projek ba baruh sektor betanam betupi tu enggau ungkus penyampau RM259, 620, 200.00.
Nya alai, ari 43 buah projek nya naka ke diatu, 36 agi dalam perambu enggau siti projek udah tembu sereta enam projek agi benung dipejalaika,” ku iya.
Friday ke mega ADUN Krian dirandau pemberita pengudah bechairmanka Aum Lumpar Ketiga 2024 Komiti Kereja Sektor Pemansang Agro Betanam Betupi BDDA diatur ditu, kemari.
Tandu iya, BDDA ba baruh pegai iya naka ke diatu mega udah melanja sepenyampau RM10 juta tauka 3.8 peratus ari penyampau semua agih ti udah dikemendarka perintah ngagai komiti nya.
Pemujur nya diasaika manah enti bepelasarka timpuh projek nya dipunka, ti udah dikemendar sereta dipejalaika ba baruh komiti nya.
Ku Friday agi, iya mega andal semua projek bagi taun 2024 ba baruh pegai komiti nya ulih dipejalaika penuh ba pun taun baru tauka ujung taun tu.-TVS
