KUCHING, 20 Sept: Pekit Main Bol Nembiak Tetutup ti diatur Petroliam Nasional Berhad (PETRONAS) diasaika ulih nyadi siti pantar ti pemadu manah ungkup pemansang bakat main bol di Sarawak.
Direktor Teknikal Kuching FC, Wan Jamak Wan Hassan madahka, program nya ulih meri penemu tumu ngagai bakat baru ngambika sida ulih nyereta pekit liga, seraya mantu nyungkak pengandal sida.
Iya nerangka, pekit nya mega iya nya pantar besai dikena ngiga bakat baru ti ulih dikerembaika nyadi pelapis ngagai tim main bol Sarawak.
“Laban aku meda tetiap raban tauka tetiap tim ke dilatih tu bisi bakat diri empu.
“Nyadi, bakat nya ti deka diansah kami ari raban nya, baka orang madah, enti digempuru ba endur ke sama, sempama baka ‘Sebab nila setitiklah’,
“Reti nya, ketegal siti ulah, semua enggai nyadi magang.
“Nyadi, kitai deka ti pemadu manah nya pansut ari tim nya, kitai ngempuru ke sida ti pemadu manah dikena meri latih ngagai pemain, lalu engka pemain ti pemadu manah tu deka sama enggau sida mantaika utai ti pemadu manah agi,”ku iya.
Iya bejaku munyi nya lebuh dirandau pemberita rambau Pekit Main Bol Nembiak Tetutup PETRONAS ditu, kena Hari Minggu ke udah.
Pekit nya nerima penyereta ari 16 tim bagi kategori baruh 10 taun enggau format pekit liga dua tim.
Empat tim ti pemadu manah deka bepekit baru ba pekit semi final ke deka diatur kena 10 November 2024.
Udah nya, pekit final disadang deka diatur kena 16 November 2024.-TVS
