KUCHING, 20 Sept: Kompleks Unit Pekara Pengarap Bukai (UNIFOR) ba Jalai Ong Tiang Swee ditu dipelaba deka berengkah dibuka ba suku keterubah 2025.
Naka diatu, pengawa ngaga begunan nya udah manggai 99.37 peratus tembu.
Sapit Premier Sarawak, Datuk Amar Douglas Uggah Embas ke mega menteri bekuasa ngagai UNIFOR, madahka lisin operasyen dipelaba deka dipansutka kena ujung bulan September tu.
“Kitai andal Permit Diau (OP) deka disuaka ujung bulan September tu.
”Begunan tu makai kus nyauka manggai RM80 juta (RM73 juta nyengkaum pengawa berunding enggau ke bukai), lalu kitai betuah laban bulih kunteriktor enggau penyanding penemu ka chukup manah, nya alai projek tu bejalai enggau manah sereta nitihka ripih ti ditetapka,”ku iya maya ngabas taba projek Kompleks UNIFOR ditu pagi tadi.
Nangkan ke nya, Uggah mega ngemeratka guna kompleks UNIFOR nyadi kelai pelasar inklusif Perintah Sarawak ba baruh Strategi Pemansang Pasca Covid-19 (PCDS) 2030.
“Tu siti pekara ti ngemegahka ati kitai di Sarawak lalu aku ngarapka UNIFOR deka terus megai tanggungpengawa iya dalam ngempung rayat di wilayah tu,” ku iya.
Begunan kompleks UNIFOR disikap enggau mayuh bengkah perengkaguna, nyengkaum dewan ke ulih muat urung 1,000 iku mensia, semilan lot kedai enggau opis, sereta 256 lot entepan kerita ke deka diguna ungkup mayuh bengkah aktiviti enggau program.-TVS
