KUCHING, 20 Sept: Kaul kerejasama entara Malaysia – Indonesia dikearap terus tegap dalam mayuh bengkah sektor di Sarawak berindik ari pemindah Indu Mengeri Nusantara (IKN) ba Kalimantan.
Premier Sarawak Datuk Patinggi Tan Sri Abang Johari Tun Openg ngarap, kerejasama ke udah lama ditempa nya ulih dikerembaika agi.
“Iya nya kelai bekaban, pemereti ati enggau kerejasama ti udah lama ditanka pengelama beberapa dekad, kitai ti nyadi rebak penerus patut ngetanka pemeruan kaul manah tu,” ku iya.
Iya bejaku munyi nya nengah teks iya ke dibacha Menteri Pemansang Indu, Nembiak Mit Enggau Pengelantang Komuniti, Dato Sri Fatimah Abdullah rambau Pengerami Resepsi Diplomatik Ulang Taun Republik Indonesia Merdeka Ke-79 ditu, kemari.
Tandu iya, Malaysia enggau Indonesia bekunsika siti kaul ti ditanggam enggau adat bebasa, kerejasama sereta nilai rumpun ke sama.
Berebak enggau nya, pengawa negapka pengelantang ungkup pemansang ba rantau patut diteruska nengah pengawa nyerungkai mayuh bengkah bidang ti ngembuan potensyel.
“Kitai ngarap kerejasama bilateral Indonesia enggau Sarawak nengah ekonomi, sosiobudaya, servis komuniti nyengkaum atur nyaga nembiak ba Palan Pelajar Komuniti (CLC) ba ladang-ladang di Sarawak, potensyel kolaborasyen nya seraya nyadika Sarawak nyadi ‘immediate neighboor’ Indonesia dalam semua bidang, kitai ngarap nya ulih terus ditanka,” ku iya.
Sama bisi datai Konsul Jeneral Republik Indonesia Kuching, Raden Sigit Witjak-Sono sereta bini iya Lucy Octavia Witjaksono.-TVS
