KUCHING, 20 Sept: Raban penyereta Kongres Perubat Tropika Enggau Malaria dipinta dikena nguna manah Pemintar Artifisyel (AI) sereta berundingka pasal empas ubah gaya mua hari dalam kongres ti diatur ba Palan Konvensyen Borneo Kuching (BCCK).
Sapit Premier Sarawak, Datuk Amar Dr Sim Kui Hian madahka, dua pekara nya beguna dikena munaska penyakit tropika enggau malaria, ti sebagi ari elemen dikena nyapai Juluk Pemansang Meruan (SDG) Serakup Besai Bansa (PBB).
”AI bisi ditu enggau kitai, nyadi berandau mih senentang AI, nyadang pengerusak teknologi, tang chara kitai ngubat penyakit, chara kitai ngemeran, chara kitai bejalaika pansik (semua nya diambi kira).
“Sekalika kita setuju tauka enda, kita nangi pasal nya tauka enda, kita patut nerima.
“Nyadi, aku deka madah ubah klimate laban mayuh udah bebadi nyawa. Nyadi, nya meri empas ngagai Malaria, nya meri empas sechara geografi, nya ulih ngeruga sechara bemusin, pengelekai enggau semua nya.
“Nyadi, kitai ti nyadi komuniti saintifik patut bejalaika atur lebih mayuh agi,” ku iya.
Iya bejaku munyi nya rambau bejadika Kongres Antarabansa Ke-21 ungkup Perubat Tropika enggau Malaria (ICTMM) 2024, kemari.
Kelimpah ari nya, Dr Sim mega nangkan raban penyereta ngambika nguna manah peluang nengah kongres tu dikena berandauka pasal pansik ti pemadu baru, bekunsika peneleba enggau ngemansangka strategi dikena ngurangka empas penyakit raing kera sereta potensyel igi penyakit nya jemah.
Tandu iya, taja pan igi penyakit nya agi ba tikas likun, tang pemisi penyakit nya mantaika pemesai guna atur nyikap, matau enggau mekanisme jampat dikena nagang penyakit baru.
Nungkatka rambai jaku ‘Timbal Global Enggau Pengawa Pansik Entara Disiplin Dikena Munaska Penyakit Tropika’, kongres nya digulu urung 1, 200 iku penyereta ari lebih 58 menua, ti nyengkaum raban saintis, lutur, sektor industri, pengubah polisi sereta raban bekuasa antarabansa.
Dr Sim mega ngemataka pengawa nyain Sempekat Pemereti Ati (MoU) entara perikatan Asia ungkup perubat tropika enggau parasitologi bagi kerejasama akademik sereta pengawa pansik.-TVS
