SARATOK, 20 Sept; Pengawa ngaga Dewan Komuniti Kaki Wong ke beungkus RM500, 000 endang chara Perintah Sarawak dikena mulaika baru status Kaki Wong nyadi sebengkah ari palan sosioekonomi besai rayat ke diau di menua pesisir Saratok.
Kaban Kunsil Nengeri (ADUN) Krian Friday Belik madahka, pemisi palan nya deka muka peluang ngagai urung 2,000 peranak ari 11 buah rumah panjai ke besemak ngaul diri dalam bemacham aktiviti sosioekonomi.
“Nengah pemisi dewan tu kitai ngarapka mensia mayuh ari 11 buah rumah panjai di sitak Kaki Wong tu deka ngasaika pemaik ari segi pekara rama, rekreasyen enggau mega aktiviti ke bukai baka ekonomi.
“Dulu suba Kaki Wong endang palan sosioekonomi di menua pesisir Saratok.
“Nya alai, kitai naka ulih mulaika pendiau Kaki Wong awakka nyadi siti palan ditapatka komuniti ba Kaki Wong ditu,” ku iya.
Iya madah munyi nya maya dirandau media pengudah Pengawa Nyerahka Taba Ngaga Baru Dewan Komuniti Kaki Wong di ditu pagi tadi.
Friday madah, pemisi diewan nya mega deka mutarka penanggul ditapi mensia mayuh ke deka ngatur pengerami besai.
Ku iya, pengawa ngaga dewan komuniti nya nengah agih belanja ari Kaunsil Pengatur Gerup Wang Sitak Konsesi Kampung Sarawak (LKWKKH) lalu dipelaba tembu bulan March taun baru.
Projek dewan nya mega siti ari empat projek ke dikemendar nengah agih belanja LKWKKH Sarawak ngaul kos penuh ke manggai RM1.23 juta.-TVS
