SPAOH, 15 Sept: Hari Malaysia endang hari ke chukup besai reti ngagai rayat Sarawak kelimpah Hari Kebangsaan enggau ke bukai.`
Ba penemu peranak di pelilih Spaoh dia tebal agi sida ngarapka menua Sarawak terus maju sereta likun dibaruh iring Premier Sarawak Datuk Patinggi Tan Sri Abang Johari Tun Openg.
Ku Sarip Liam, iya berasai temegah nyadi rayat Malaysia lalu ngarapka menua tu meruan likun.
“Pengandal kitai laban ke nyadi rayat Malaysia iya nya kitai temegah nyadi rayat Malaysia, udah tentu kitai ngembuan siti kuing tuju dikena nentuka menua kitai mengkang likun.
“Arapka rebak dudi nemu naka utai ke diasaika sehari tu iya nya asil pengawa orang kelia nyadi kitai ngarapka utai ke nyadi diatu terus diasai rebak dudi ila,” ku iya maya dirandau TVS ditu, empai lama.
Udah nya ba penemu Azri Hanafi, iya ngarapka menua tu terus maju dibaruh iring Premier Sarawak.
“Selamat Hari Malaysia… Arapka Malaysia maju lantang lebih agi nengeri Sarawak. Ngarapka dibaruh iring Datuk Patinggi Tan Sri Abang Johari kitai terus maju lantang Sarawak merdeka,” ku iya.
Udah nya ba penemu Zamirul Kam, nyerumba Hari Malaysia iya ngarapka menua tu terus beserakup nengah bemacham budaya.
“Selamat Hari Malaysia 2024 arapka semua kitai terus beserakup taja ngembuan bemacham budaya di menua tu. Arap terus lantang, salam segulai sejalai,” ku iya.
Pengerami Hari Malaysia Renggat Nasional diintu ba nengeri Sabah kena 16 September tu.
Udah nya ba renggat Sarawak pengerami Hari Malaysia deka diatur ba mengeri Simanggang.-TVS
