BETONG, 14 Sept: Program Bejalai Bebala Mayuh Nyerumba Bulan Merdeka ti diatur Sekula Sekondari (SMK) Saint Augustine, Betong pagi Hari Lima richah.
Urung 1,250 iku nembiak enggau pengajar sereta staf sukung bisi ngambi bagi ngerichahka program nya.
Prinsipal SMK Saint Augustine Betong, Ujai Sambau madahka, pengawa ngatur aktiviti baka nya beguna dikena nerenak enggau ngangkatka semangat patriotisme ngaul nembiak sekula.
“Aku nemu senentang nengah aktiviti baka tu, lebih ari nerenak tang kitai deka ngangkatka agi semangat patriotisme sayauka menua ba raban nembiak sekula kitai tu.
“Kitai ulih meda, chunto iya, rambai jaku kami sehari tu (Hari Lima) iya nya ‘Kampung People Jiwa Merdeka’, ke alai nengah awak tu, kitai deka meda raban nembiak kitai ngambika sida ngembuan chara runding kreatif.
“Pia mega nganbika sida nemu berundingka chara baka ni komuniti genturung pendiau pengudah merdeka nengah pengawa mandangka chara ngena gari baka ti dipeda kitai sehari tu,” ku iya.
Tandu pengajar Ujai , kelimpah nangkup takwim sekula, program bejalai bebala mayuh tu mega ngembuan tuju deka ngenang sereta meretika Hari Kebangsaan sereta sebagi ari chara ti nemban dikena nerenak semangat patriotisme ba raban nembiak sekula.
Program Bejalai Bebala Mayuh diatur berengkah ari pukul 7.30 pagi nya richah enggau ngena pekayan sereta senyata tradisional komuniti Melayu kelia.-TVS
