PUSA, 14 Sept: Premier Sarawak Datuk Patinggi Tan Sri Abang Johari Tun Openg ngelalau komuniti enggau pengani di sitak Parlimen Batang Lupar kelebih agi pelilih menua pusa ngambika lebih kreatif enggau ngaul diri dalam sektor dagang enggau betanam betupi.
Ku iya, pengawa bejalaika perambu enggau pelin pemansang ti berurun ke disukung semangat penyerakup komuniti pupu bansa nyata ulih meri pemaik ngagai pemansang komuniti sereta pelilih Pusa.
Abang Johari madah munyi nya nengah teks jaku iya ke dibacha Sapit Premier Sarawak, Datuk Amar Douglas Uggah Embas rambau pengerami bejadika Regata Tandang Sari (RTS) 2024 di Dataran Tandang Sari Pusa, pagi tadi.
“Seriris enggau perambu sereta pelin pemansang ti berurun, aku pechaya pelilih Pusa ulih mansang jampat seninjik enggau sukung semangat penyerakup rayat.
“Kitai pechaya, penyerakup rayat pupu bansa sereta bemacham pengarap ulih meri penguntung ari sukut pengidup komuniti enggau budaya ti unik ke ulih dieksploitasi nyadi produk dagang temuai, produk pemakai komersial sereta sektor dagang enggau betanam betupi,” ku iya.
Nungkatka rambai jaku ‘Kita Satu’, Regatta Tandang Sari ti diatur tu ngembuan tuju dikena mandangka kelai budaya, sejarah enggau seni di pelilih menua Pusa sereta Maludam.
Berebak enggau nya, program nya mega dikearapka ulih dipejalaika jemah ila ngambika ulih mandangka kelai penyerakup enggau budaya sereta ngenegapka kaul dalam bemacham budaya kelimpah ngerapitka kaul diri sebilik.
Tandu iya, bisi 21 tim udah ngambi bagi dalam edisyen taun tu ti ngungkupka perais mata duit sepenyampau RM67, 850.
Ba edisyen taun siti ke udah, tim Barracuda ari Kampung Kalok udah mujur ngempu gelar champion Trofi Tandang Sari 2023 sepengudah menang ba achara sakai 30 lalu ngujungka sida mai pulai perais mata duit RM15,000.-TVS
