PUSA, 14 Sept: Perintah Sarawak komited deka ngangkatka tikas pengidup rayat enggau ngerumban pemansang di menua pesisir nyengkaum di pelilih Pusa.
Premier Sarawak, Datuk Patinggi Tan Sri Abang Johari Tun Openg madahka, mayuh macham projek besai benung dipejalaika di pelilih nya baka projek ngaga jematan dikena ngelayang sungai besai di Batang Lupar enggau Batang Saribas.
Abang Johari madah munyi nya nengah teks jaku iya ke dibacha Sapit Premier Sarawak, Datuk Amar Douglas Uggah Embas rambau pengerami bejadika Regata Tandang Sari (RTS) 2024 di Dataran Tandang Sari Pusa, pagi tadi.
“Perintah Sarawak amat komited dalam ngangkatka tikas pengidup rayat enggau ngerumban pemansang Sarawak lebih agi di kandang menua pesisir tu.
“Mayuh macham projek besai benung dipejalaika baka jematan ti dikena ngelayang sungai besai di Batang Lupar enggau Batang Saribas ti dijangka ti deka meri pemaik timpuh panjai dudi ila.
“Perengkaguna tu deka nyambung jalai pesisir Sarawak ti udah diangkatmanah nyadi jalai alternatif ke zon tengah Sarawak kelimpah Jalai Besai Pan Borneo,” ku iya.
Iya madahka, pelilih pusa enggau pelilih mit Maludam bepalan ba lokaliti ti strategik enggau mega ngembuan puncha pengeraja asal ti kaya ke patut diserungkai sechara intensif nengah penyereta komuniti lokal.
Perintah Sarawak nengah Opis Menteri Pengeraja Asal Enggau Pemansang Mengeri Sarawak ku iya, diatu ba renggat kepenudi deka diputuska ungkup pelin lokalti berurun lebih agi bagi palan adminstrasyen di pelilih Pusa.-TVS
