SARATOK, 14 Sept: Komuniti lebih agi di Saratok dipinta sama meri sukung ngemujurka inisiatif Kimpin Satu Rumah Satu Jalur Gemilang (1R1JG) Beserimbai enggau Kimpin Kembara Merdeka Jalur Gemilang (KMJG) 2024.
Kaban Kunsil Nengeri (ADUN) Krian Friday Belik madahka inisiatif nya dikena ngerichah sereta nerenakka ulah sayauka menua kelebih agi ngagai nembiak rebak baru.
“Semua tuai raban bansa, pemesai opis perintah, kaban komuniti Madani enggau semua peranak rumah panjai patut sama ngitang Jalur Gemilang nya ba rumah, opis, kedai, sekula sereta ba sebarang endur ti engkeman enggau pengandal ti tinggi.
“Aku ngarapka semua kitai sama nyukung inisiatif kimpin 1 Rumah 1 Jalur Gemilang (1R 1JG) ke tanda sayauka menua,” ku iya.
Iya madah munyi nya nengah teks jaku dibacha Sekretari Politik ngagai Premier Sarawak, Bell Bernard Aggan beserimbai enggau Program Kembara Merdeka Jalur Gemilang (KMJG) 2024 Renggat Pelilih Saratok di Rumah Panjai Jamu Akang Peligong ditu, kemari.
Tandu iya, Pengerami Hari Kebangsaan enggau Hari Malaysia ti setipak enggau rambai jaku Malaysia Madani : Jiwa Merdeka taun tu dikena nyadi kelai penyerakup dalam menua merdeka dikena ngemansangka sosioekonomi sereta ngangkatka maruah rayat ngagai tikas ti tinggi agi.-TVS
