DEBAK, 14 Sept: Insiden nyau deka anyut ditabanka arus deras lebuh datai pasang raya nyadi 48 taun ke udah, mimit da deka nabanka nyawa iya enggau bala bakih bukai siti pengingat ke enda ulih dibuai ex-kaban Pasukan Polis Hutan (PPH) ASP Piee Alwi nyentuk ke sehari tu.
Maya penyadi nya iya enggau bala bakih ke bukai dalam Infantri Platun 13D Kompeni Batalion 17 Batu Kawah dianjung ngagai siti operasyen nyidi teda komunis ba Sungai Rusa Sarikei.
Piee ke udah dipadu nyadi Temenggong madah, penyadi nya udah meri empas ngagai pengidup iya nyentuk bisi maya iya berasai takut tauka rawan maya deka mandi ke sungai.
“Pekara ke meruan dikeingat aku lebuh kami operasyen di sitak Sungai Rusa Sarikei, maya nya kami nirika langkau arau (kimbis) enda ngadang ai pasang ngemalat nya.
“Maya nya ujan, bisi dinga munyi ribut datai ari ulu urung pukul 7.00 malam.
“Sekali tak datai ai besereta batu ari ulu langkau arau kami.
“Nyadi kami semina sempat ngidupka diri, senyata semua basah kena ai lalu tengelam tang enda lenyau.
“Sekeda bala kami nyau deka lemas tang mujur ngidupka diri, kami chukup kesal.
“Kati enti penusah nya nyadi tengah malam, asai aku mayuh bala kami tengelam laban ai nyadi nya mih penusah ke nuntung nyadi pengingat ke enda ulih buai sampai sehari tu,” ku iya.
Ku terang iya, taja pan peneleba nya nadai ngaul pengawa betimbak tang penusah nya endang pengingat ke chukup besai reti sekumbang tiga taun gawa nyadi kaban Pasukan Polis Hutan kenyau ari taun 1973 nyentuk 1976.
Ku iya, rebak diatu lebih agi sida ke biak patut beratika reti merdeka abis nadai ngitauka Jalur Gemilang genap kali datai Hari Kebangsaan tauka Hari Sarawak.
Iya mansutka jaku nya maya dirandau TVS ba rumah iya di Kampung Debak Laut, ditu empai lama.
Temenggong Piee ada kena 17 Julai 1953, berengkah gawa nyadi PPH taun 1973 pengudah abis Kus Pemun Polis ba Palan Latih Polis (PULAPOL) Kuala Lumpur pengelama dua taun.
Asil nikah enggau Saerah Ocey, 66 taun seduai bisi lapan iku anak iya nya dua iku indu enggau enam lelaki sereta udah bisi 13 iku uchu.
Dua ari anak lelaki iya diatu benung gawa nyadi polis ba Sarawak.
Temenggong Piee pinchin ba Indu Opis Polis Kontinjen (IPK) Kuching lalu pangkat kepenudi disandang iya nyadi Asistan Superitenden Polis (ASP) taun 2008.-TVS
