SARATOK, 14 Sept: Dalam jeman pemansang teknologi pemadah tauka media rama kemaya hari, pengelikun penguna diperati majak tekeruga ketegal pengerembai berita pelesu, penerang bejai orang enggau jenayah siber.
Dikena nagang pengerembai nya, Tuai Penulung Direktor Unit Media enggau Komunikasyen Korporat (JAPEN) Sarawak Ajes Tuah madah, perintah nengah Komiti Komunikasyen enggau Multimeda Malaysia (SKMM) deka ngasuh mesti bisi lisin ungkup semua servis media rama ebggau pesan interent dibaruh Akta Komunikasi Dan Multimedia 1998 berengkah Januari taun baru.
“Media rama diatu pan kitai mayuh meda bemacham isu lalu diatu perintah naka ulih ngubah rang undang-undang baru bekaul enggau jenayah siber tu kelebih agi ti ngaul raban orang biak.
“Diatu enti di media rama lebih agi facebook kitai meda mayuh penerang bisi nya enda betul lalu patut dipantis ungkup sida ke nembiak ti rindu muka facebook tu.
“Tolong mih bejimat maya muka laman web ke nyelai,” ku iya.
Iya madah munyi nya maya Program Kembara Medeka Jakur Gemilang 2024 Renggat Pelilih Saratok ba Rumah Jamu Akang ditu, kemari.
Ku tandu iya, semua tuai raban bansa enggau kaban komuniti MADANI dibaruh kemata Opis Pemadah Malaysia ditangkan bejalaika atur jampat nyadi ejen ngerembiaka polisi perintah.
Dulu ari nya, Konvoi Kembara Merdeka Jalur Gemilang betuaika iya empu datai pukul 2.30 lemai ba Pelaman Rumah Panjai Jamu di Sebetan Saratok.
Penatai raban konvoi nya udah nya dikelaluka bala tuai opis perintah, raban veteran soldadu enggau tuai rumah sereta tuai rabna bansa sebedau dibai bejalai niti ruai seraya bekelala enggau 200 iku pengani ba rumahpanjai nya.-TVS
