DEBAK, 12 Sept: Urung 30 iku nembiak lepas Setipikit Tinggi Sekula Malaysia (STPM) ari sitak Kunsil Nengeri (DUN) Saribas udah nerima insentif pelajar lati STPM 2023 sepenyampau RM16, 500.
Sapit Menteri Pemansang Indu, Anak Mit enggai Pengelantang Komuniti (KPWKK) Sarawak Datuk Mohammad Razi Sitam madah, iya andal nengah pemeri insentif nya ulih meri peransang ngagai nembiak ngambika terus lati ba bidang pelajar sida.
“Arapka insentif nya deka nyadi peransang ngagai bala nembiak bukai dikena nyapai penyulut baka ke dipandang raban nembiak baka ke malam tu.
“Aku mega andal nengah insentif tu iya ulih narak semangat ransing belajar nyapai pemujur ke lebih besai.
“Nya alai, aku ngarapka nengah insentif tu nyadi peransang nembiak terus nyapai pemujur ba bidang pelajar dudi hari,” ku iya.
Datuk Mohd Razi Sitam madah munyi nya nengah teks jaku iya ke dibacha Pegawai Opis Pelilih Mit Debat Mohamamad Khairurani Mohammad Ibrahim ba Pengerami Nyerahka Insentif Pengelati STPM Sekula Sekondari (SMK) Saribas 2023 ditu, ensana.
Ku iya, laban ke nyadi pengari raya iya deka naka ulih meri sukung ari segi belanja ungkup guna sepanjai maya.
Dulu ari nya, bisi 30 iku nembiak lepas STPM bela nerima insentif penyulut ke udah dijapai diri empu.
Nitihka rikod, pemutus STPM 2023 SMK Saribas ba penuduk ketiga pemadu manah ari 16 buah sekula sekondari ba selampur Sarawak.
Tu bepelasarka rikod Purata Nilai Gred Penuh (PNGK) 3.25 nangkan SMK Sacred Heart enggau SMK Chung Hua Sibu.-TVS
