KUCHING, 12 Sept: Premier Sarawak Datuk Patinggi Tan Sri Abang Johari Tun Openg ngarapka kontinjen Para SUKMA Sarawak ulih nunda pemujur ke dijapai kontinjen Sarawak nyadi champion penuh maya edisyen Lumba Malaysia 2024 empai lama.
Iya madahka, atlit Para SUKMA Sarawak bisi potensyel ke besai sereta bisi daya nempa pemujur bepekit ba wilayah tu empu ke nyadi tuai rumah ngatur Para SUKMA.
“SUKMA 2024 kitai udah nyadi champion, nya alai aku deka meransang para SUKMA pan bisi daya nyadi champion serak tu.
“Aku enggau bala kabinet perintah Sarawak seruran bebendar deka meri latih ti chukup sereta pemadu manah ngagai raban atlit Para Sarawak, taja pan kitai nganjung sida belatih ba menua luar.
“Tu laban kami udah meda potensyel ti dikembuan bala atlit (kitai) Sarawak,” ku iya.
Abang Johari mansutka jaku nya rambau Program Nyerahka Menira Para SUKMA Kontinjen Sarawak 2024, ditu lemai kemari.
Berebak enggau nya, iya nerangka, perintah Sarawak deka ngungkupka penyampau insentif ke sama ngagai atlit ti mujur bulih midul ba pekit Para SUKMA serak tu.
“Sehari tu (Hari Tiga) Dato Sri Fatimah Abdullah naga 83 midul emas, insentif ke sama diberi kami ngagai kontinjen para Sukma.
“Midul emas (penyampau insentif) sama diberi ngagai sida.
“Ambika chunto RM15, 000, lebih sejuta ringgit. Anang irau kita, Abang Jo tetap meri sukung,” ku iya.
Pekit Para SUKMA serak tu deka diatur di Kuching berengkah ari 22 nyentuk 28 September ngaul 10 lumba enggau main sereta 328 achara.
Nitihka rikod, kontinjen Para SUKMA Sarawak kala nyadi champion penuh pekit Para SUKMA 13 kali bejurut kenyau ari taun 1994 nyentuk 2018.-TVS
