DEBAK, 12 Sept: Semua bala nembiak Sekula Sekondari (SMK) Saribas ke udah nerima insentif lati STPM 2023 bela bekunsi pengaga ati bekaul enggau insentif ke udah diterima sida.
Siku ari penerima insentif nya Siti Hawa Abdul Kassim ti deka nampung pelajar ba Universiti Pendidikan Sultan Idris (UPSI) madah diri chukup gaga lalu beterima kasih ngagai apai engau indai iya laban udah bendar melanja iya sekula.
“Terima kasih ngagai apai enggau indai aku laban udah mayuh melanja aku sekula. Aku meri terima kasih besai,” ku iya maya dirandau TVS ba Pengerami Nyerahka Insentif Pengelati STPM Sekula Sekindari (SMK) Saribas 2023 ditu, ensana.
Udah nya, ba penemu Cathterine Mundu Geruka ke mega deka nampung pelajar ba UPSI meri terima kasih ngagai bala pengajar laban udah bebendar ngajar nyentuk iya bulih pemutus peresa STPM ke chukup lati.
“Keterubah iya kau deka meri besai terima kasih ngagai semua pengajar ke udah ngajar aku nyentuk nyapai pemutus ke lati baka ke sehari tu.
“Aku berasai gaga sereta temegah enggau pemutus tu, terima kasih ngagai semua pengajar ke enda putus meri peransang ngelama tu,” ku iya.
Nangkan ke nya, Norismayanti Jawi ke deka nampung pelajar ngagai Universiti Malaya (UM) ngasaika insetif ke diterima iya nya ulih nyadi peransang ngambi terus nyapai pemujur dudi hari.
“Insentif ari pengari rayat tu ulih meransang kami ngambika ransing agi belajar dikena nyapai pemujur dudi hari,” ku iya.-TVS
