SIBU, 8 Sept: Anugerah Carta Sapa Juara (ACSJ) endang pantar pemadu manah ngagai penanyi enggau penengkebang lagu nempa nama seraya ngangkatka industri lagu Iban ngagai tikas ke lebih tinggi.
Kaban Kunsil Nengeri (ADUN) Tamin Christopher Gira Sambang madah, nengah pengawa ngatur pekit ACSJ ulih nyadi kelang endur raban pemekuh industri lagu Iban mandangka pengulih diri.
“Tu utai ke manah reti nya lagu Iban udah bisi potensyel, bisi kualiti, manah ukai semina pemayuh tang kualiti ke pemadu manah,” ku iya.
Iya madah munyi nya maya bejadika Pekit Semi Final Anugerah Carta Sapa Juara (ACSJ) Ke-8 diatur Wai FM Iban di Kem Belia Kemuyang Sibu, malam tadi.
Berebak enggau nya, ku iya raban pemekuh industri patut ngemeratka kualiti dibanding enggau pemayuh ba genap karya ke digaga sida.
Tandu iya, raban artis Dayak lebih agi penanyi Iban patut nemu pemesai guna sida masuk nyadi kaban sesebengkah gerempung muzik ngambika pengelantang dijaga ari sukut hakcipta enggau royalti karya sida.
Dulu ari nya, bisi 22 iku artis solo enggau dua artis beraban besemekih ngerebut 12 penuduk masuk renggat final ti deka diatur 26 Oktober tu.
Antara 12 iku artis solo enggau beraban ke mujur nyingkang ngagai renggat final ACSJ Ke-8 iya nya Donny Lang nengah lagu Idup Sama Sekunsi, Ramles Walter (Ensiban), Dayana Shini (Selantang Timang), Anthony Usan (Tepambar) enggau Richard Lee (Engkeraju Enda Berega).
Ditangkan Jeffry Lawerance (Takat Pengidup), Tony Rumpang (Indu Bansa Dayak), Rosiana Urai (Jeritan), Hani J (Nyabak Kediri), Steve Seegan (Rangkang Patah Tanah Tusur), Dara Hellena (Kedap Seputku) enggau Lemambang Lemai (Penguji).-TVS
