KUCHING, 5 Sept: Lebih 3,000 iku mensia dipelaba deka ngerichahka Stadium Kompleks Lumba enggau Main Sri Aman ungkup ngerami Hari Malaysia kena 16 September tu.
Menteri ke bekuasa ngatur pengerami Hari Malaysia Renggat Sarawak 2024, Dato Sri Roland Sagah Wee Inn madahka, pengerami ke diatur tiga hari berunggu ba mengeri Simanggang nya deka dipungkal enggau pengerami meri kasih ari pengarap bukai sereta konsert rayat diatur kena 14 September.
Nya alai, Roland ke mega Menteri Pelajar, Inovasyen enggau Pemansang Bakat Sarawak madah, kena 15 September bisi diatur pengerami meri terima kasih ba Masjid Bandar Sri Aman lalu ditangkan enggau pengawa begempuru.
“Bisi 3,000 iku laban kami bisi nambah orang ke datai kia maya nya.
“Pia mega, kami melabaka mayuh orang ngulu pengerami ke diatur ba stadium ti ngujungka bangku enda chukup.
“Nya alai, kami deka nyendiaka kimbis (langkau kain) ba luar stadium,” ku iya.
IYa mansutka jaku nya pengudah nguluka delegit komiti Pengerami Hari Malaysia Renggat Sarawak 2024 Nemuai Meri Basa Ngagai Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar, sehari tu tadi.
Sama bisi datai Sapit Menteri Pemansang Bakat, Datuk Francis Hollis, Direktor Unit Protokol, Tusun Adat enggau Pengatur Achara Sarawak, Hamdan Sarbini sereta Direktor Unit Komunikasyen Perintah Sarawak Samuel Simon.-TVS
