SARATOK, 5 Sept: Penusah angus ke nuntung pengani Rumah Panjai Spencer Biju di Ulu Sebetan Saratok udah nerima perati perintah besai enggau perintah nengeri.
Kaban Dewan Negara Senator Pele Peter Tinggom madah , kelimpah ari bantu tumu baka meri perengka dikena ngaga rumah, barang ke dikena ninting hari mega udah diserahka Opis Pengintu Pengelantang Komuniti ungkup semua sida ke tebunsa.
Ku iya, perintah udah bisi perambu timpuh pandak enggau panjai dikena nentuka pengani rumah panjai nya nerima bantu ke patut.
“Kenyau 21 Ogos ke udah, pengudah penusah angus nya sida (pengani Ulu Sebetan) udah bulih bantu ari sekeda ejensi perintah enggau NGO.
“Ambika chunto, bantu ari Opis Pengintu Pengelantang, Opis Pemansang Nengeri Sarawak, sereta mayuh bantu ke bukai udah diberi ngagai pengani rumah panjai ke tebunsa nya.
“Pia mega, agi mayuh perambu timpuh panjai udah digaga perintah besai enggau perintah Sarawak dikena ngelempungka tating pengani ba rumah panjai nya ti tebunsa ketegal ditinggang penusah angus ke nyadi apin lama ke udah,” ku iya.
Iya mansutka jaku nya rambau dirandau pemberita pengudah Program Nyerahka Bantu Ngagai Pengani Rumah Panjai Spencer Biju, Ulu Sebetan ari Opis Pemansang Nengeri Sarawak ditu pagi tadi.
Berebak enggau program nya mega, bisi 17 tuai bilik (KIR) udah nerima pemeri mungkur barang guna ninting hari enggau bantu mata duit penyampau RM8,500.-TVS
