BANGKOK, 5 Sept: Ejensi Pemansang Bagi Menua Betong (BDDA) ngembuan juluk nyerungkai makit produk ti bepelasarka nyiur ba pelilih Betong.
Sapit Premier Sarawak Datuk Amar Douglas Uggah Embas madahka, BDDA mega merambu deka ngasilka bamacham produk ti bepelasarka nyiur, kelimpah ari utai tanam domestik ke bukai ti bisi potensyel dikemansang ba pelilih nya.
Ku iya, tu sebagi ari proses tambah diken amantu nyerungkai makit luar ke baru.
“Bekaul pemansang nyiur tu dudi hari, kita mesti mantaika nya ngagai Sarawak.
“Baka ni kita meda pemansang nyiur tu ila di Sarawak, nyengkaum projek Biojar kitai? Tang profesor madah mayuh uras ba ladang kelapa, tang aku ngasai enti ngaul mensia mayuh, endang mayuh uras.
“Di Betong, kami mega betapi penanggul uras ke mayuh enggau benung ngiga jalai dikena mutarka pekara nya. Kami nemu senentang di Thailand, sida ngembuan rampa endur ti beresi.
“Nya alai, kami ngarap pengudah pulai ke menua ila, kitai mega ngembuan juluk ke sama.
“Engka projek Biojar ulih mantu kitai tauka nyual mesin nya ngagai kami ba rega ke patut,” ku iya.
Empai lama, Uggah ke mega Chairman PEMANDU BDDA bisi ngatur penemuai ngagai Serikat Thai Coconut Company Limited ba wilayah Ratcha Buri.
Serikat nya ditumbuh kenyau ari taun 2008 laly udah meranakkka pukul sepenyampau 250 Baht tauka RM32 juta lalu diatu puku untung iya udah manggai 400 juta Baht tauka RM51 juta.
Serikat ti endang tebilang enggau pemansut sereta eksport produk bepelasarka nyiur baka santan, ai nyiur enggau nyiur rangkai diatu ngembuan urung 3, 000 iku pengereja pengawa.
Sida mega ngulihka bekal nyiur tuai ari ladang pemesai 90, 000 hektar ari 30 pemekal iya nya ari serata Thailand.-TVS
