BETONG, 4 Sept: Industri sulam kain buri dikeandal ulih ngerembai sereta dikomersialka setikas enggau krafjari tradisional bukai di nengeri tu.
Kain buri ti endang dikelala ari komuniti Iban diatu majak dikerinduka pemekuh seni, kelimpah aspek budaya sereta pesaka asal ketegal ngembuan kualiti ke tinggi.
Bepelasarka pengerembai positif nya, Penulung Direktor Kanan Opis Pemansang Sarawak Zon Sri Aman, Nor Izzah Marzuki madahka, raban iya deka bekerejasama enggau ejensi ke bekaul sereta komuniti dikena ngangkatka program ngaga kain buri nya, lebih agi di pelilih Betong.
“Siti program ti endang manah laban aku meda mayuh penyereta serak tu iya nya bisi sida ari bansa Melayu taja kain buri tu asal iya ditempa raban bansa Iban.
“Nya alai, aku meda tu siti pengawa ke chukup manah,” ku iya.
Iya bejaku munyi nya lebuh dirandau pemberita maya ngulu Kelas Ngaga Kain Buri diatur Komiti Pemansang enggau Pengelikun (JKKK) Kampung Tengah Betong, ditu, empai lama.
Udah nya, ku Sekretari JKKK Kampung Tengah Betong Abang Nurjayadi Abang Khusairi pengawa ngatur program nya mega diasaika chukup nemban dikena nyaut saran ari Sapit Premier Sarawak, Datuk Amar Douglas Uggah Embas ti deka komuniti di Betong chakah ngaul diri dalam industri krafjari tradisional.
“Projek Burie tu laban kami nyaut saran enggau juluk ari iya ke dipebasa Datuk Amar Douglas Uggah Embas ti deka komuniti ba kandang endur Betong tu chakah agi ngaul diri dalam industri krafjari, tebal agi ke ngaul industri krafjari tradisional.
“Nyadi, kami ngasaika pilih kami ungkup Projek Kain Buri tu deka bulih potensyel penuh,”ku iya.
Kelimpah ari nya, bisi 20 iku penyereta ngambi bagi dalam kelas kain buri ke alai mayuh sida gagit deka ngulihka peneleba baru ba pengawa asil pengelandik jari.
“Ngelama tu kami semina ninga sulam songket, baju kurung enggau ngaga keringkam.
“Nyadi, sehari tu aku berasai temegah ati enggau utai ti dikeulih aku enggau juluk, nya ulih meri peluang sereta penemu baru dalam bidang krafjari,”ku iya.
Udah nya, ku siku agi penyereta Hasralinda Mos madah program nya siti Peneleba ke baru ngagai komuniti Melayu ti ngelama tu semina nemu pasal songket, lalu ba awak ke sama aku merambu deka bejalaika aktiviti dagang ti bepelasarka seni ngaga krafjari buri.-TVS
