BETONG, 1 Sept: Udah datai maya iya pelilih Betong patut disikap enggau sebuah velodrom tebuka, ku Dato Gerald Rentap Jabu.
Sapit Menteri Nembiak, Lumba enggau Pemansang Pedagang Sarawak nya madah, pemisi velodrom nya chukup beguna bepelasarka timbal tauka penyampau penyereta pekit Karnival Lumba Ensikal Layar (LCC) majak nambah ninting taun.
Nya alai, iya ngarapka udah tu raban Gerempung Ensikal Nengeri Sarawak ngaga pansik ke lebih silik ngambika pelilih Betong ulih nyadi siti palan pemansang lumba ensikal ungkup wilayah tu.
“Kitai merambu deka ngasuh Gerempung Ensikal Nengeri Sarawak mansik siti ari palan ba Betong tu nyadi siti fokus ngagai lumba ensikal ari segi velodrom kitai kebendar mayuh bansa velodrom, siti ari nya nyangka kitai ulih ngaga velodrom tebuka, trek BMX ari segi MTB kitai mayuh palan ba sitak kitai ditu secara fokus dikena ngemansangka lumba ensikal.
“Aku meda timbal enggau pemar kitai begunaka siti palan khas endur kitai belatih ari segi ensikal lalu kitai udah berandau enggau jurulatih kitai ari SSC enggau mega Kaunsil Lumba Nengeri.
“Kitai ngasaika Betong tu nyangka siti palan ke menyana patut digaga ungkup lumba ensikal,” ku iya.
Rentap ke mega Kaban Kunsil Nengeri (ADUN) Layar madah munyi nya maya dirandau media pengudah Nangguhka Karnival Lumba Ensikal Layar (LCC) edisi ke-6 2024 ba Arena Futsal RTC Layar, sehari tu tadi.
Ku terang Rentap, arapka Gerempung Ensikal Sarawak (SCA) ke nyadi pemegai entaruh lumba nya ulih meri sukung penuh ngagai perambu ngaga velodrom nya ba Betong awakka pekara nya ulih diperundingka Opis Menteri Nembiak enggau Lumba Sarawak.
Iya madah, pengawa ngaga velodrom di Betong chukup senutuk enggau LCC ke majak nerima timbal ke manah ari raban penyereta kenyau iya diatur ari taun 2018.-TVS
