BETONG, 31 Ogos: Pengawa ngatur Karnival Ensikal Layar (LCC) 2024 mujur nyungkak sosio ekonomi pemekuh industri mit enggau jelan pemesai (PKS) di pelilih Betong.
Chairman Pengatur LCC 2024, Morris Nayup madah, pekara nya nyata dipeda baka palan endur bemalam iya nya hotel, homestay, bansal sereta restauran ngelinggi Betong dedat laban penatai mensia mayuh ti bela meri sukung ngagai program nya.
“Nyadi achara tu ulih nyadi pelantar ukai semina latih ungkup pemain sereta ngansah bakal baru tang mega ulih ngangkatka sosioekonomi komuniti lokal baka hotel, homestay,bansal enggau ke bukai.
“Taun tu pengatur deka nyadika Karnival Ensikal Layar lebih manah enggau lebih mayuh penyereta lalu bisi pelumba tebilang menua baka Mohd Razif Salleh enggau ke bukai,” ku iya.
Iya mansutka jaku nya rambau Pengerami Makai Lemai Bejadika Karnival Ensikal Layar (LCC) Edisyen Ke-6 2024 ditu malam kemari.
Udah nya iya madah, pengatur LCC bisi muka 48 unit bansa bejual Kaunsil Makit Betanam Betupi Perintah Besai (FAMA), 26 unit bansal raban pedaja Melayu Betong, 10 unit bansa pemakai ungkup raban ukai Muslim, enam foodtruck kelimpah bemacham ruai eksibisyen ari ejensi perintah.-TVS
