BETONG, 30 Ogos: Pendiau sekula ke lantang beguna amat dikena perintah ngadaka modal mensia ke lati tauka nyulut ungkup dudi hari.
Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu madah, Perintah Sarawak diatu chukup ngemeratka pemansang modal mensia ke lati ungkup bidang-bidang ekonomi baru ti deka dipejalaika udah tu.
“Mayuh juluk enggau pengingin kitai dikena ngemujurka modal mensia kitai.
“Modal mensia kitai iya nya bala anak kitai ditu.
“Bala anak tu mih dalam timpuh 10 taun deka datai ila deka ngiring ekonomi nengeri Sarawak dalam bidang-bidang baru baka hidrogen, ART, sarang nyimpan karbon enggau ke bukai nyengkaum ba pekara digital,” ku iya.
Iya ke mega Kaban Kunsil Nengeri (ADUN) Layar madah munyi nya maya bejadika Pengawa Nasih Tanah Projek Ngaga Baru Sekula Repuk ba SK Saka Layar Betong, kemari.
Ku terang iya, dikena ngemujurka juluk nya bala nembiak ba renggat sekula primari patut diterang pasal chara belajar bepelasarka teknologi dikena ngemudahka sida belajar.
Ku Rentap, iya mega sedia mantu nembiak sekula ba sitak DUN Layar nengah Komiti Pemansang Pelajar Layar (LEDC) dalam ngemujurka juluk nya.
Sama bisi datai Kaban Parlimen Betong Dr Richard Rapu enggau ke bukai.-TVS
