BETONG, 30 Ogos: Kunteriktor ke udah dichiri megai tangkup pengawa bejalaika projek pemansang ngaga baru sekula repuk ba Sarawak dilalau patut bejalaika pengawa diri enggau manah penuh integriti.
Kaban Parlimen Betong Dr Richard Rapu madah, nya dikena nentuka genap projek ke deka digaga sida bejalai enggau mujur lalu tembu nitih timpuh ke udah ditetapka ejensi bekaul.
“Pemuntan iya ke udah dipeda kitai ari taun 2019 nyentuk 2022.
“Kitai ngarapka nya ulih nyadi lalau ngagai kunteriktor projek ngaga sekula-sekula repuk tu.
“Ngarapka (projek) SK Saka tu ila enda tejanggal, arapka kunteriktor beintegriti, manah pengawa enggau bejalaika tanggungpengawa enggau meruan dikena nentuka projek udah tembu nitihka timpuh ti udah ditetapka,” ku iya.
Iya mansutka jaku nya maya Pengerami Nasih Tanah Projek Ngaga Baru Sekula Repuk di SK Saka Layar ditu, kemari.
Ku iya, naka ujung taun 2022 semina 123 ari 386 penyampau semua projek pemansang ngaga baru sekula repuk ba selampur menua mujur ditembu.
Tandu iya, penyampau nya patut nyadi lalau semua raban ke bekaul ngambi patut nentuka juluk perintah dalam nyendiaka palan belajar ke lantang ungkup nembiak sekula tejapai.
Ku iya, bepelasarka Ripot Tuai Audit Menua (LKAN) ba taun 2022 madahka tusun atur ngemanah sekula repuk ba selampur menua ba tikas ti enda ngemantupka ati.
Ke penerang, Projek Pemansang Ngaga Baru Sekula ba SK Saka Layar Betong ke bisi 45 iku nembiak udah dikemendar ba taun 2021 enggau penyampau semua ungkus projek manggai RM12 juta.
Projek nya dipelaba tembu kena September 2026 ngaul pengawa ngererak begunan lama, siti blok administrasyen kategori (a), siti blok pra sekula kategori (a), dua blok buding, bilik mandi enggau agu kategori (a).
Udah nya, pengawa ngaga sebuah dewan makai ke ulih muat 50 iku nembiak kategori (a), siti blok rumah pam ai, pantar tangki ai beringkat, pengawa mekanikal enggau karan sereta pengawa bukai ke bekaul.-TVS
