BETONG, 29 Ogos: Pelajar Pengerai Seksual ba jeman moden diatu enda ulih agi dikumbai mali lebih agi ba raban komuniti di Sarawak.
Kaban Parlimen Betong Dr Richard Rapu madah, pelajar pengerai seksual nya patut dikerembai ba sekula ngambika bala nembiak diberi penemu tumu dikena mutarka isu nembiak baruh umur betubuh bisi ke majak ngirauka ati.
“Jarang kitai ninga apai indai kitai berandauka pasal pekara tu (seks) enggau bala nembiak tang randau pengerai seksual agi kurang sereta dikumbai mali dalam komuniti.
“Kebendar nitihka pansik ke udah digaga mandangka pelajar sentang chara nyeliahka kes betubuh bisi deka lebih ngasi dikena ngurangka kes nya dalam komuniti enti sida udah ngembuan penemu ke mansau,” ku iya.
Iya madah munyi nya maya Nutup Program Intervensi Rama Penyedar enggau Advokasyen Pelajar Seksual (KAPS) Renggat Menua Betong 2024 ba Dewan Sekula Sekondari (SMK) ULu Layar, kilah ensana.
Ku terang iya, nembiak lelaki mega patut nyadi sebagi ari formula nya awakka sida diajar penemu ke patut.
Nitihka pansuk ku iya bepelasarka tinjau Kaunsil Pemansang Rama (MPS) Sarawak mandangka lebih 80 peratus nembiak nemu pasal seks enggau atur nagang iya nengah bala bakih enggau media rama dibanding ari ari apai indai enggau pengajar ba sekula.
Dulu ari nya, bisi 300 nembiak ari Pom Satu nyentuk Pom Lima SMK Uu Layar mendingka licha pasal KAPS diatur ba dewan sekula nya.
Program ke diatur nengah kerejasama enggau Opis Pelilih Betong sereta Opis Pelajar Pelilih Betong dikemujur 11 iku pengeralicha ari bemacham ejensi bekaul.-TVS
