BETONG, 29 Ogos: Bagi menua Kuching ngerikodka penyampau kes nembiak baruh umur betubuh bisi pemadu tinggi ditangkan penuduk kedua iya nya Miri.
Kaban Parlimen Betong Dr Richard Rapu madah, udah nya bagi menua Kapit ngerikodka kes pemadu tinggi nembiak baruh umur betubuh bisi ari segi peratus penyampau kes.
“Ari segi penyampau kes nitihka bagi menua Kuching ngerikod penyampau kes pemadu tinggi 459 kes, Miri (291), Sibu (271), Bintulu (250) lalu Kota Samarahan (120).
“Udah nya, ari sukut peratus nembiak betubuh bisi enti nitihka penyampau bagi menua Kapit pemadu tinggi iya nya 13.03 peratus ditangkan Sri Aman (9.19), Sarikei (8.48), Betong (8.16) enggau Serian (8.05),” ku iya maya Nutup Program Intervensi Rama Penyedar enggau Advokasyen Pelajar Seksual (KAPS) Renggat Bagi Menua Betong 2024 ba Dewan Sekula Sekondari (SMK) Ulu Layar, kilah ensana.
Ku tandu iya, ungkup timpuh lapan taun kenyau 2016 nyentuk Julai 2024 Kaunsil Pemansang Rama Sarawak (MPS) udah bekerejasama enggau bala kaban One Stop Centre Teenage Pregnancy Commitee (OSTPC) ba renggat nengeri enggau bagi menua mutarka urung 70 renggat Program KAPS ba sekula primari enggau sekula sekondari di selampur Sarawak.
Udah nya, ku iya MPS mega benung ngelanggur deka bejalaika 12 iti program KAPS ba sekula sekondari di selampur Sarawak.-TVS
