SARATOK, 29 Ogos: Raban pengemeran industri lagu Iban di nengeri tu ditangkan terus ngemeratka budaya komuniti dalam genap karya tauka lagu ke ditengkebang diri empu.
Presiden Gerempung Anak Seni Iban Malaysia (PASIMA) Isa Lee madah, nya beguna amat dikena nyeliahka sebarang peragam negatif ngagai budaya bansa Iban seraya dikena nyaga industri lagu Iban ngambika terus maju enggau ulih besemekih enggau lagu etnik bukai di menua tu.
“Kitai ke nyadi Komposer nyadi penanyi tauka kitai pengemeran dunya seni pemerindang dikearapka anang enda nyaga budaya tauka daya pengidup kitai ba lagu kitai Iban.
“Ari segi klip video, lirik, leka jaku, muzik ke dipasuk kitai ba lagu nya tadi patut dijaga identiti tauka kualiti pendiau pengidup kitai.
“Anang entu ninchai mih…awak ke bansa bukai enda salah anggap enda salah peragam ngagai pengidup kitai,” ku iya maya dirandau TVS di Kuching, empai lama.
Ku iya, industri lagu enggau muzik Iban diatu majak mayuh berubah seriris enggau pusin jeman enggau teknologi dibanding enggau lagu-lagu ke ditempa jeman 60-an, 70-an enggau 90-an ke agi terunda-runda enggau lagu menua barat nyengkaum menua sepiak iya nya Indonesia enggau Filipina.
Ku terang iya, pengelandik enggau kreativiti raban pemekuh industri mega udah ngelempaika lagu Iban kemaya hari tu ngagai siti tikas ke chukup ngemegah lalu ulih besemekih ngagai tikas antarabansa.-TVS
