TATAU, 26 Ogos: Pengawa ngatur Pesta Tatau 2024 deka diatur lebih richah, ke alai bisi 30 aktiviti udah disediaka sepanjai sepuluh hari achara ninting taun nya dipejalaika.
Menteri ba Opis Premier Sarawak, Dato Sri John Sikie Tayai madahka, taja pan pesta besai nya deka berengkah dipejalaika kena 5 September, tang bansal bejual berengkah beoperasyen kena 30 Ogos tu nyentuk 15 September ti deka datai.
Entara penyelai ti deka dibai ba edisyen serak tu iya nya pengawa ngatur malam budaya enggau etnik tauka ‘Cultural Night Showcase’.
“Entara program malam budaya ti deka diatur iya nya malam santai budaya komuniti iban, komuniti china, komuniti memaloh, komuniti punan, komuniti baketan, komuniti kenyah, komuniti vaie enggau komuniti tetau,” ku iya.
Iya bejaku munyi nya Rambau Aum Media Pesta Tatau 2024, bepalan ba Opis Pelilih Tatau, kena Hari Satu tu tadi.
Raban pengatur mega nerima 17 penyereta ari menua pengimbai, Brunei Darussalam ti deka bepekit dalam Lumba Powerboat.
“Tu nyadika semua penyereta bisi 36 tim enggau 92 buah bot udah ngerejister nyentuk sehari tu enggau dijangka deka nerima lebih mayuh penyereta laban haribulan tutup agi lama. Engka bisi mayuh agi deka nyereta achara powerboat tu,” ku iya.
Tandu iya, Pesta Tatau deka dipunka enggau pengawa nasih ai kena 4 September 2024 tauka pengawa miring dikena minta berekat sebedau berengkah bejalaika Achara Lumba Ai.
Pengerami Bejadika Pengawa Ngelancharka Pesta Tatau 2024 deka diatur kena 5 September 2024, ke alai pesta nya deka dipunka enggau pengawa miring muka kelang sereta mega deka mandangka mayuh macham program budaya.
Pesta Tatau serak tu mega nyendiaka perais penyampau RM10, 000 ngagai sida ti bulih gelar Raja Sungai Regata Tatau.
Ungkup penerang, pengawa ngatur pesta tatau 2023 udah nerima lebih 75, 000 iku temuai sepanjai program nya dipejalaika enggau penyampau asil jual ti ditaga lebih RM3.8 juta.-TVS
