LIMBANG, 26 Ogos: Peranak ba sitak Batu Danau patut meri kerejasama penuh dikena ngemujurka pejalai Projek Jalai Besai Trans Borneo ke deka digaga enda lama agi.
Kaban Kunsil Nengeri (ADUN) Batu Danau Dato Paulus Palu Gumbang madah kerejasama peranak di sitak nya beguna amat laban pengawa ngaga jalai tu deka ngaul pengawa ngererak bansal bejual, langkau enggau utai tanam ba tisi jalai ke bekaul berengkah ari Tedungan nyentuk ke mengeri Limbang.
Ku iya projek jalai nya deka besambung enggau menua Miri, Brunei enggau Limbang sereta digaga empat iti arung.
“Aku ngarapka bala peranak ke bekaul lebih agi rumah-rumah ke deka direrak, diasuh pindah, pun rian ke disayau kena tebang, anang ringat beri mih kerejasama ngambika projek tu ila ulih bejalai enggau lanchar.
“Pia mega ngambika kitai ulih ngasaika perengkaguna enggau jampat sereta ulih digaga nitih timpuh ke udah ditetapka,” ku iya.
Paulus nerangka pekara nya maya Pengerami Nutup Program Randau Solidariti Komuniti (PRSK) di Dewan Kampung Limpasong, malam Hari Enam.
Projek nya deka berengkah ari ari Tedungan nyentuk ke mengeri Limbang lalu ditampung nyentuk ke Pandaruan Limbang semak pelilih Temburong menua Brunei.
Projek Jalai Besai Trans Borneo dibaruh Perintah Besai nya sebedau tu dikumbai Jalai Besai Pan Borneo.
Jalai Besai Trans Borneo ngembuan pemanjai 96.3 kilometer deka besambungka menua Sarawak ke Sabah nengah Brunei Darussalam.-TVS
