KUCHING, 25 Ogos: Tuai Pemegai Menua (TYT) Nengeri Sarawak Tun Pehin Sri Dr Wan Junaidi Tuanku Jaafar enggau bini iya Toh Puan Fauziah Mohd Sanusi ngenataika jaku tabi puji nuju Kontinjen Sarawak bekau ari pemujur nyadi champion Lumba Malaysia (SUKMA) ke-21 Sarawak 2024.
Iya mega temegah meda japai atlit Sarawak ke bulih midul dikena nempa sejarah baru sereta mantupka juluk ati nganti pengelama 30 taun endur ngempu gelar champion penuh.
“Aku berasai gaga meda kontinjen Sarawak dipadu nyadi champion penuh pengudah bulih 76 midul emas,” ku iya.
Tabi puji mega nuju Perintah Sarawak lebih agi Premier Sarawak Datuk Patinggi Tan Sri Abang Johari Tun Openg laban udah mujur ngatur Pekit Lumba Pemadu Besai ba Malaysia.
“Terima kasih mega ngagai kontinjen ari nengeri bukai laban udah bekerejasama sereta nyukung dikena ngemujurka pekit SUKMA di Sarawak.
“Enda tinggal mega ngagai atlit ari nengeri bukai.
“Aku deka meri tabi puji ke pemendar, kerejasama, semangat lumba enggau sukung kita dalam ngemujurka lumba SUKMA Sarawak 2024.
Tandu iya, semangat ke udah ditunjukka atlit ba SUKMA nyadi peransang ngagai nembiak terus bebendar dikena ngemajuka diri.
Berebak enggau nya, iya mega meri jaku tabi puji nuju Menteri Nembiak, Lumba enggau Pedagang Sarawak Dato Sri Abdul Karim Rahman Hamzah sereta Sapit Sekretari Perintah Sarawak (Operasyen) Datu Hii Chang Kee laban udah nentuka SUKMA serak tu bejalai enggau lanchar.
Nya alai, iya berasai temegah meda komitmen ti dipandangka Sapit Menteri Nembiak, Lumba enggau Pedagang Sarawak, Dato Gerald Rentap Jabu ke mega Chef de Mission sereta semya raban ke udah ngambi bagi dikena nentuka semua atlit ke bepekit nadai napi penanggul.-TVS
