DEBAK, 25 Ogos: Pemujur Atlit Nyemerai Sarawak Nurul Farisya Alia Affendi 15 taun ari Kampung Tengah Tuie Debak bulih tiga midul ba Lumba Malaysia (SUKMA) Sarawak 2024 nyata mandangka anak ari menua pesisir ulih pegari ba bidang lumba.
Kaban Kunsil Nengeri (ADUN) Saribas Datuk Mohammad Razi Sitam madah, laban ke nyadi ADUN Saribas iya berasai temegah enggau pemujur ke dijapai Nurul Farisya Alia.
“Tu mandangka mayuh bala anak kitai ari menua pesisir ke ngarika Sarawak ba pekit SUKMA tu baka Nur Farisya Alia ti udah nunjukka anak menua pesisir mega ulih nempa nama nyadi pemeri midul emas ba achara SUKMA tu,” ku iya.
Razi ke mega Sapit Menteri Pemansang Indu, Anak Mit enggau Pengelantang Komuniti Sarawak madah munyi nya pengudah ngulu sebengkah program ba Dewan Millenea Debak, kemari.
Ku iya, Nurul Farisya endang atlit kedua ari sitak DUN Saribas ke chukup mujur ba SUKMA 2024 pengudah teulihka tiga midul emas ba achara terejun.
Nya alai, iya madah diri andal Nurul Farisya deka terus nyulut ba bidang lumba terejun dudi hari.
Atlit ari DUN Saribas ke kala nyulut ba SUKMA sebedau tu iya nya Rosatimah Muhammad lalu diatu iya udah diangkat nyadi penulung jurulatih tim terejun SUKMA Sarawak 2024.-TVS
