LUNDU, 24 Ogos: ‘Aku deka nitihka apai, ngetan bubu undang’, pia ku jaku kepenudi niang Vilkie Wilson ke ditemu lemas pengudah perau ke ditepan iya begulai enggau 15 iku penumpang ke bukai karam ba Batang Kayan, pun mingu tu tadi.
Lebuh nusuika pekara nya, apai iya, Wilson Nyaggi, 49 taun, chukup sinu ngenang penusah ke nyadi sekelip mata pengudah iya nganjung anak lelaki iya nya ngagai jelatung sungai nya.
Ku Wilson maya malam sebedau penusah nyadi, anak pengkuan ari empat diri menyadi nya bisi mandangka penyelai mimit, iya dipeda diau diri sepanjai hari.
“Malam sebedau penusah nyadi iya nadai mayuh jaku, enggau indai iya pan iya enda betanya, iya ditanya enda nyaut, enggau aku iya bisi nyaut sekali sebedau bekejang ngagai perau.
“Pagi nya, ari rumah laban udah lemai. Langgur aku enggau iya sepengudah pulai ari sekula sehari nya, kira pukul 2 lemai, deka ngabas bubu undang,” ku iya.
Iya mansutka pekara nya maya dirandau pemberita ba Pendam Kristian ba Kampung Selampit, kemari.
Chukup sinu, ku Wilson lebuh ninga rita anak iya nya benung ngumpul duit asil ke diulih maya mantu bejual asil tasik deka dikena meri kereban lumba.
“Iya empu perambu, deka meli baju, tanchut enggau kereban dikena bemain badminton.
“Tang iya nadai madah ke aku, iya semina madah ngagai indai iya aja.
“Iya nyimpan duit tiap kali pengudah iya enggau aku ngabas bubu, aku meri iya 100 baka nya, dikena meri peransang ngagai iya.
“Nya mih disimpan iya deka dikena meli kereban ke nadai dipadah ngagai aku.
“Pekara udah nyadi, baru indai iya madah ngagai aku, iya deka meri kereban (lumba) nya dikena bemain badminton,” ku iya.
Ba penusah ke nyadi kena Hari Dua tu tadi, perau ke ditepan Vilkie enggau Vilkie Alasma Jithil, 14, Helena Fasha Petrus, 16, karam maya deka ngelayang Batang kayan.
Semua sida tiga ditemu lemas kena Hari Empat sepengudah diripotka lenyau bekau ari penusah ke karam nya.-TVS
