BETONG, 24 Ogos: Siku atlit angkat berat Sarawak ke udah mujur bulih midul engkeraju Brickleen Jessie Hiew madah diri berasai gaga enggau asil ke udah dijapai iya laban semina sempat belatih pengelama urung sebelas bulan sebedau pekit Lumba Malaysia (SUKMA) 2024.
Beduduk ari nya, Brickleen besemaya deka bebendar agi belatih ngambika ulih nyapai rikod ti lebih manah ba SUKMA ti deka datai.
“Pengasai ati aku udah tentu gaga laban belatih amat enda lama semina 11 bulan.
“Nya alai tu mih utai ulih aku…udah tu deka bebendar agi belatih ungkup pekit ti deka datai,” kuiya.
Iya mansutka timbal nya maya dirandau pengudah tembu pekit angkat berat SUKMA Sarawak 2024 ke diatur di Betong, kemari.
Nangkan ke nya, Brickleen madahka agi insentif ke diulih iya asil ari pekit nya deka diberi ngagai indai iya nyadika perais.
Iya madah diri chukup beterima kasih ngagai bala bakih sereta mesia mayuh ke udah meri sukung sekumbang pekit nya diatur.
Brickleen teulihka midul engkeraju ba kategori indu lebih 76 kilgram sepengudah semina teangkatka pemerat 180 kilogram.
Midul emas ba kategori nya dipenggi Siti Aqilah Farhana Draman ari Terengganu ke mujur teangkatka pemerat 226 kilogram ke mega nyadi rikod baru menua ba kategori nya.
Udah nya, midul pirak dipenggi Nur Alyaa Nabilah Ahmad Nazri ari Kedah ke mujur teangkatka pemerat 181 kilogram.-TVS
