BETONG, 24 Ogos: Jurulatih Angkat Berat Tim Lumba Malaysia (SUKMA) Sarawak 2024 Jonathan Patrick madah diri tetap tepantup ati sereta beterima kasih enggau asil ke udah dijapai raban atlit dibaruh iring iya.
Ku iya, raban atlit dibaruh iring iya udah bebendar nunjukka pengulih diri sekumbang timpuh pekit nya diatur di Betong.
“Tepantup ati mega taja pan kitai sehari tu pengelama seminggu tu kitai udah enggau naka ulih (bebendar) munyi ku orang endang bisi hari ti meri pengasa tang nadai ku enggau kitai tetap meri terima kasih enggau utai ke udah diulih,” ku iya.
Iya mansutka jaku nya maya dirandau ba Dewan Lumba Tan Sri Datuk Amar Stephen Kalong Ningkan Betong, kemari.
Bepelasarka rikod, tim SUKMA Sarawak 2024 semina mujur bulih siti midul pirak enggau dua midul engkeraju.
Midul pirak diulih nengah Samuel Frankyn Edward ba kategori lelaki lebih 96 kilogram lalu midul engkeraju dijapai nengah Katierina Bojing ba kategori indu 45 kilogram enggau Brickleen Jessie Hiew ba kategori indu lebih 76 kilogram.
Ku terang iya, udah tu sida deka belelak pengelama sebulan sebedau ke nyambung latih ungkup nyikap diri napi SUKMA 2026. -TVS
