KUCHING, 22 Ogos: Perintah Sarawak merambu minta Lumba Borneo (Borneo Games) diatur baru, ku Datuk Patinggi Tan Sri Abang Johari Tun Openg.
Premier Sarawak madah, buah penemu nya udah dipansutka iya ngagai Menteri Nembiak enggau Lumba, Hannah Yeoh.
Ku iya, achara lumba nya ila deka ngaul menua-menua ba Borneo iya nya Malaysia lebih agi Sarawak, Sabah, kalimantan (Indonesia) enggau Brunei.
“Aku mega deka mantaika perambu tu ngagai bakih kitai ba menua sepiak beduduk ari kitai benung nyikap diri napi Lumba Asia Tenggara (SEA Games).
“Sarawak deka nguji nyadi pemelanja (pengatur) Lumba Borneo,” ku iya maya bejaku ba Pengerami Makai Lemai Lumba Malaysia (SUKMA) Sarawak 2024 di Palan Konvensyen Borneo Kuching, malam tadi.
Abang Johari andal pengawa ngatur achara lumba nya ila deka nyadi pantar ngiga atlit-atlit lumba betikas antarabansa ari rantau Borneo.
Lumba Borneo keterubah diatur ba Brunei taun 1954.
Sabah, Sarawak enggau Brunei udah begintir nyadi tuai rumah pekit nya sebedau kepenudi iya diatur ba Brunei taun 2009. – TVS
