BETONG, 22 Ogos: Bantu tumu mungkur barang guna ninting hari ngagai 105 iku sida ke tasah angus ari Rumah Panjai Spencer Biju di Ulu Sebetan Roban udah dianjung.
Kaban Kunsil Nengeri (ADUN) Krian Friday Belik madah, naka tu semua sida ke tasah udah diasuh ngenduh ba Palan Pengenduh (PPS) di Dewan Serbaguna Roban.
“Lemai kemari nengah Opis Pengintu Pengelantang Raban Bansa (JKM) Bagi Menua Betong kami udah nganjung bantu tumu iya nya barang pemakai ungkup semua ruang bilik ke tasah.
“Kelimpah ari nya sekumbang timpuh sida ngenduh ba Palan Pengenduh (PPS) sida deka deka diberi bantu ari segi pemakai, perubat, lampin anak mit enggau mega sida ke udah lunggar umur,” ku iya.
Friday mansutka jaku nya maya dirandau TVS ba Dewan Lumba Tan Sri Datuk Amar Stephen Kalong Ningkan di Betong sehari tu tadi.
Ku iya, raban sida mega benung ngatur bantu ungkup semua sida ke tasah ari rumah panjai nya.
Friday madah semua bantu nya deka dibagi sepengudah nerima ripot penuh ari Opis Pelilih Saratok ke nyadi Komiti Penyangga Penusah Pelilih.
Lemai Hari Tiga tu tadi, urung pukul 12.40 tengahari Rumah Panjai Spencer ke ngundan 26 pintu bilik dituntung penusah angus lengis.
Penusah nya ngujungka 105 iku sida ke diau ba rumah nya semina tinggal gari ba punggu aja.
Diatu sida benung ngenduh ba PPS Dewan Serbaguna Roban ke dibuka terus bekau ari penusah nya.-TVS
