BETONG, 22 Ogos: Main gumpal isi mesti ditanka enggau dipekitka baru ba tetiap kali Lumba Malaysia (SUKMA) ke diatur udah tu.
Jaguh Gumpal Isi Menua Sazali Samad madahka pengawa ngatur achara nya beguna bendar dikena ngiga bakat baru ngambika menua tu enda pungkang atlit biak ba main nya.
“Nya alai, enti bisi pengawa ngatur lumba gumpal isi di SUKMA endang manah dikena kitai ngangkatka main gumpal isi.
“Nya alai kitai deka nguga bakat-bakat ke bisi ngambika ulih nyadi penerus ngarika Malaysia ba renggat Antarabansa.
“Enti bisi achara gumpal isi dipetandingka di SUKMA, aku empu deka meda baka ni atlit-atlit deka masuk ngagai achara nya,”ku iya.
Iya mansutka penemu nya rambau ngemataka pekit ba achara Angkat Berat Kategori Indu ba Dewan Lumba Tan Sri Datuk Amar Stephen Kalong Ningkan Betong, kemari.
Ku iya madah agi, atlit gumpal isi udah tu ulih abis nadai nyemelaka rikod enggau pemujur ke udah digaga iya sepemanjai nyadi atlit dalam lumba nya.
Sekumbang udah ngaul diri dalam lumba gumpal isi nya, Sazali udah menang gela Mr Universe penyampau 10 kali kenyau taun 2000 nyentuk ke taun 2014.
Kelimpah ari bulih semilan gela Mr Asia ari taun 1996 nyentuk ke taun 2014.
Sazali mega kala nyadi olahragawan penyuah empat kali ba taun 2006, 2010, 2012 enggau taun 2014.
Bepelasarka rikod, kepenudi achara gumpal isi dipekitka ba SUKMA iya nya maya edisyen ke-17 di Kuala Lumpur taun 2013.-TVS
